Dálkingarevni í seyði minka

Hóast seyður hevur gingið á gomlum dálkaðum tyrvingarplássum, hevur kjøtið eitt lágt innihald av PCB og dioksini.

Útgivið: 18. november 2011     Dagført: 18. november 2011

Deil

Deil

Í sambandi við flettingina, sum var á heysti 2011, fekk Umhvørvisstovan kjøt av seyði, sum hevur gingið á og við ávís gomul tyrvingarpláss við Vatnsoyrar, á Krossi og í Trongisvági. Sýnini vórðu send til kanningar fyri dálkingarevnunum dioksin, PCB og blýggj.

Kanningin í 2011 er eitt framhald av tveimum kanningum, sum vórðu gjørdar ávikavist í 2008 og 2009 av mold á tyrvingarplássunum og av seyði, sum hevur gingið á hesum tyrvingarplássum. Kanningin í 2008 vísti, at innihaldið av dioksin og PCB í moldini var høgt í støðum, meðan kanningin frá 2009 vísti, at dálkingin ikki sást aftur í seyðakjøtinum.

Nú kanningarúrslitini fyri 2011 eru tøk, vísa tey eitt lægri innihald av dioksini, og PCB í seyði er enn lægri enn kanningin frá 2009 vísti. Kanningin vísti eisini, at innihaldið í seyði við Vatnsoyrar og Trongisvág er lægri enn á Krossi. Sostatt verður mett, at rímilig trygd er fyri, at seyður, sum gongur á ella við gomlu tyrvingarplássini við Vatnsoyrar, á Krossi ella í Trongisvági, ikki er dálkaður við dioksin ella PCB. 

Í talvuni niðanfyri sæst, at innihaldið av dálkingarevnunum í sýnunum frá 2011 liggur væl undir ES markvirðunum. Virðini eru givin sum TEQs/g fita; TEQ er ein stytting fyri toxic equivalent, og er eitt mát fyri innihaldið av dioksin og PCB.
 

 *Úrslit frá 2009 víst í klombrum
**i.k. merkir ikki kannað

Seyðakjøtið frá ávísum tyrvingarplássum hevur eisini verið kannað fyri blýggj, og vísa úrslitini eins lágt ella lægri innihald enn í 2009.

Vilt tú vita meira um kanningina, kanst tú seta teg í samband við Mariu Dam, tlf. 232470, MariaD@us.fo