Veðurlagspolitikkurin – uppgerð fyri 2010
Nýggja uppgerðin yvir útlát av vakstrarhúsgassi gevur høvi at tríva í nøkur av málunum, sum vórðu sett í almenna veðurlagspolitikkinum í 2009 og staðfesta, hvussu støðan er.
Í mun til at náa yvirskipaða málið um at minka samlaða útlátið við 20% innan 2020, kann staðfestast, at útlátið av vakstrarhúsgassi í 2010 var 4% lægri enn tað var í støðisárinum 2005. Eftir at útlátið minkaði tvey ár á rað, vísti 2010 uppgerðin eina munandi øking í útlátinum. Sí mynd niðanfyri.
Mynd 1 Gongdin í samlaða útlátinum av vakstrarhúsgassi í Føroyum tíðarskeiðið 2005-2010, roknað sum munur í prosentum í mun til útlátið í 2005. Reyða punkteraða linjan vísir málið, sum er 20% undir útlátið í 2005. Útlendsk fiskiskip eru ikki íroknað.
Upphiting
Tá tað kemur til málið um at fáa nýtsluna av olju til upphiting niður í eina helvt innan 2020, hevur samlað sæð gingið rættan veg, men enn restar nógv í, áðrenn komið er á mál. Kalda veðrið í 2010 var høvuðsorsøk til lutfalsliga stóra útláti í fjør. Oljunýtslan hjá húsarhaldum, handlum og stovnum má minkað heili 40% næstu 10 árini um málið skal røkkast.
Mynd 2 Gongdin í útlátið av vakstrarhúsgassi frá upphiting árini 2005-2010, roknað sum munur í prosentum í mun til útlátið í 2005. Reyða punkteraða linjan vísir málið, sum er 50% undir útlátið í 2005.
Elframleiðsla
Seinnu árini er alt meira olja brúkt til at framleiða streym, ikki minst í 2010. Staðfestast kann at lutfalsliga minni partur av streyminum verður framleiddur úr varandi orkukeldum. Sostatt gerst útlátið av vakstrarhúsgassi eisini størri, sí mynd niðanfyri. Av tí at elframleiðslan í 2010 var nógv darvað av trupulleikum við framleiðslukervinum, er sannlíkt, at størri partur av elframleiðsluni fer at verða framleiddur úr varandi orku komandi árini.
Mynd 3 Gongdin í partinum av elframleiðsluni, ið stavar frá varandi orkukeldum tíðarskeiðið 2005-2010, roknað sum munur í prosentum í mun til støðisárið 2005.
Les meira….
- Les meira um hvussu tað gongur at náa málunum, sum vórðu sett í almenna veðurlagspolitikkinum her.
- Les almenna veðurlagspolitikkin her
- Á heimasíðu okkara hava vit dagført øll tølini fyri útláti av vakstrarhúsgassi fram til 2010. Har finnur tú eisini nærri frágreiðingar og fleiri grafar. Sí her.
Nærri fæst at vita við at ringja til Suna Petersen, deildarleiðara á Umhvørvisstovuni, tlf. 342400 , ella við at senda okkum ein teldupost us@us.fo.
