Skipasmiðjan umhvørvisgóðkend
Virksemið hjá P/F MEST í Tórshavn hevur fingið umhvørvisgóðkenning
Umhvørvisstovan hevur tann 12. des. 2013 givið virkseminum hjá P/F MEST í Tórshavn umhvørvisgóðkenning. Í góðkenningini eru m.a. settar treytir til innrætting og rakstur av virkinum, fyri at fyribyrgja og avmarka dálking av umhvørvinum frá virkseminum í Tórshavn.
Virksemið á MEST er ný- og umbygging, umvælingar og viðlíkahald av skipum og øðrum flótandi eindum, sum antin liggja við kai ella verða tikin upp. Talan er bæði um stál- og timburskip.
Í umhvørvisgóðkenningini er serligur dentur lagdur á, at útlátið av dálkandi evnum til bæði sjógv og luft, er so lítið sum gjørligt. Harafturat er treyt sett til, at MEST í Tórshavn skal hava eina umhvørvisstýrisskipan, sum m.a. inniheldur skrivligar mannagongdir fyri stýring av virkseminum hjá MEST, so sum røkt av reinsiskipan, dálkingaravmarkandi tiltøk og fyribyrging av óhappum.
Eisini er dentur lagdur á, at virksemið ikki elvir til luktampar ella óljóðsampar í nærumhvørvinum.
- Umhvørvisgóðkenningin kann lesast her.
- Almenna lýsingin av góðkenningini er her.
- Les um umhvørvisgóðkenningar og umhvørvisgóðkend virki her.
Góðkenningin kann kærast
Tey, ið hava kærurætt, kunnu kæra umhvørvisgóðkenningina til landsstýrismannin í umhvørvismálum.
Kærurætt hava tey, sum avgerðin hevur ein serstakan, beinleiðis og persónliga týdning fyri. Les meira um at kæra her.
Møgulig kæra skal sendast til Umhvørvisstovuna, Traðagøta 38, 160 Argir, í seinasta lagi fríggjadagin 17. januar 2014.
Vil tú vita nærri ber til at venda sær til Lenu Ziskason, málsviðgera á tlf. 342400 ella senda ein t-post á us@us.fo
