Plantupakkarnir fleiri enn nakrantíð
Alt fleiri kommunur vilja lata borgarunum plantupakkar, nú tað fer at vára. Einir 3000 plantupakkar eru umbidnir
Plantusølan heldur til á gróðurstøðini í Hoydølum
Freistin hjá kommunum at biðja um plantupakkar til í vár er farin. Undirtøkan tykist bara at vaksa. Einar 15 kommunur hava biðið Plantusøluna um plantupakkar til borgararnar hesaferð.
Fýra pakkar eru av velja ímillum. Talan er um smærri plantur í smápotti ella berróts plantur, ið eru umleið 20-60 cm høgar. Í pakkunum nr. 3 og 4 eru heldur størri og eldri plantur. Tískil eru tær ikki líka nógva sum í pakkunum nr. 1 og 2.
Kommunurnar avráða, nær tær lata borgarunum plantupakkarnar, men veðurlíkindini mugu vera í lagi. Tað er skilagott at bíða, til várlýkkan er komin í jørðina. Tað kann vera longu í apríl, ella kanska ikki fyrr enn einaferð í mai mánaði.
Áhugin vaksin øll árini
Tiltakið við plantupakkum var fyrstu ferð í Havn í 1992. Býargartnarin, Tóri í Hoyvík, hevði frætt um líknandi tiltøk í Jyllandi, og táverandi borgarstjórin, Poul Michelsen, loftaði hugskotinum í eini roynd at fáa plantað meira av trøum og runnum í Havnini. Fyrstu árini vórðu latnir 500 plantupakkar í Havn. Nú verða altso einir 3000 pakkar latnir borgarunum í einum 15 kommunum.
