Nýggjar lógir samtyktar
Áðrenn Løgtingi fór í summarferiu, vóru týðandi broytingar gjørdar í matrikullógini og í býarskipanarlógini.
Útgivið: 26. juni 2009
Dagført: 26. juni 2009
Høvuðsbroytingarnar í matrikullógini eru:
- Bygningsverk undir jørð kunnu skrásetast við matrikulnummari, vídd og hædd.
- Turrløgd og uppfylt lendi av sjóøki kunnu skrásetast sum vanligir eigindómar.
- Fjós, hjallur, úthús, seyðahús og bygningar annars, sum hoyra til festi og sum liggja í landbúnaðarøki sambært galdandi byggisamtykt kunnu býtast frá festinum.
- Jørð, sum ikki er byggilendi, kann nú býtast sundur. Minstavíddin er 5.000m2, men í góðkendari byggisamtykt ber til at fara niður í 3.000m2. Partur av felagseigindómi (uttangarðs) kann ikki býtast sundur í minni enn 2 gyllin.
- Sethúsabyggigrundir kunnu ikki leggjast út við størri vídd enn 3.000m2.
- Mesta upphædd fyri virði, sum kann verða flutt eftir reglunum um smámunaligar broytingar, er nú 50.000 kr.
- Matrikulin kann rættast, tá eigindómur er broyttur orsaka av omanlopi ella burturmáan.
Harafturat eru gjørdar aðrar broytingar í matrikullógini av meiri formligum slagi.
Herðsla verður løgd á, at bindingin millum uttan- og innangarðsjørð skal haldast. Eisini verður dentur lagdur á, at broytingar í ognarviðurskiftunum skulu vera í samsvari við góðkenda kommunala lendisskipan eftir býarskipanarlógini.
Matrkullógin hevur nú heitið: Løgtingslóg nr. 64 frá 11. desember 1962 um matrikulering og sundurbýti v.m. sum seinast broytt við løgtingslóg nr. 82 frá 25. mai 2009.
Í býarskipanarlógini eru broytingarnar:
- Freistin at seta fram kæru og broytingaruppskot í sambandi við framløgu av byggisamtykt er stytt úr 3 mánaðum til 6 vikur.
- Allar kommunur hava nú skyldu at hava góðkenda byggisamtykt fyri allar bygdir í kommununi. Freistin at senda landsstýrismanninum uppskot til byggisamtykt til góðkenningar er 31. desember 2010.
- Góðkendar byggisamtyktir skulu endurskoðast og sendast landsstýrismanninum til staðfestingar 5. hvørt ár.
- Uppfylt ella turrlagt sjóøki, tunlar og onnur bygningsverk undir jørð skulu, áðrenn hesi verða gjørd, hava heimild í góðkendari byggisamtykt.
- Allar kommunalar byggisamtyktir verða skrásettar í eini lendisskrá. Ein teldutøk útgáva av byggisamtyktini skal sendast lendisskránni innan 4 vikur eftir góðkenning.
· Harafturat eru gjørdar aðrar broytingar av meiri formligum slagi.
Býarskipanarlógin hevur nú heitið: Løgtingslóg nr. 13 frá 21. mai 1954 um býarskipanir og byggisamtyktir, sum seinast broytt við løgtingslóg nr. 81 frá 25. mai 2009.
Hesar broytingar komu í gildi dagin eftir, at lógirnar vórðu lýstar, t.v.s. 11. juni 2009.
Nærri fæst at vita við at ringja til Petur Nielsen á Umhvørvisstovuni – tlf 342400 – ella at senda stovninum ein teldupost us@us.fo.
