Nýggj krøv til Umlastingarstøð
Í sambandi við, at umlastingarstøðin hjá IRF á Gjánoyri verður dagførd og virksemið víðkað, hevur støðin fingið nýggja umhvørvisgóðkenning við nýggjum krøvum...
Treytir í nýggju góðkenningini
Í umhvørvisgóðkenningini er dentur lagdur á, at dálkandi evni ikki verða leidd út í umhvørvið, at økja um endurnýtslu og at dálkingaravmarkandi tiltøk verða sett í verk um óhapp henda. Eisini er dentur lagdur á at innaneftirlit, umhvørvisstýriskipan og skrásetingar eru sambært viðurkendum skipanum.
Umhvørvisgóðkenningin setir treytir til móttøku, goymslu og viðgerð av serliga dálkandi burturkasti, eins og treytir eru settar til undirlagið á økinum og til reinsing og kanning av frárensli frá økinum.
Nógv ymiskt virksemi
Virksemið á Umlastingarstøðini er móttøka, umskipan og skiljing av burturkasti til endurnýtslu og tyrving frá bingjuplássum, havnum, skipum og virkjum. Harumframt verður timbur skilt frá og brotið til pinnabrenni, og síðani brent á Brennistøðini. Eisini verður høll bygd til at taka ímóti elektronikkburturkasti og serliga dálkandi burturkasti, umframt at serstøk høli vera til starvsfólk.
Stórar nøgdir av burturkasti
Roknað verður við, at Umlastingarstøðin árliga fer at taka ímóti 6.000 m3 av jarni og metali, 600 m3 av bildekkum, 300 m3 av trol- og nótaleivdum, 6.000 m3 av timbri, 1.000 m3 av burturkasti til tyrving umframt 1.000 m3 av elektronikki og 200 m3 av serliga dálkandi burturkasti.
Umhvørvisgóðkenningin sæst her.
Les meira um umhvørvisgóðkenningar her.
Kæruvegleiðing
Góðkenningin kann kærast til landsstýriskvinnuna við umhvørvismálum (Innlendismálaráðið). Kærufreistin er fýra vikur frá tí at góðkenningin er almannakunngjørd.
Nærri fæst at vita við at ringja til Umhvørvisstovuna, tlf. 342400, ella Eyð Eidesgaard, tlf. 342442, ella at senda okkum ein teldupost us@us.fo.
