Er títt virki grønt?
Bjóðar títt virki eina umhvørvisvinarliga vøru ella tænastu? Ella hevur tú ætlanir um tað? Ynskir tú at gera hetta greiðari fyri kundum og øðrum?
Tá eru kunningarfundirnir, sum Umhvørvisstovan fer at skipa fyri í næstum, eitt gott høvi at kunna teg um umhvørvismerking og um grønt innkeyp. Serliga um almenna norðurlendska umhvørvismerkið “Svanurin”, men eisini um evropeiska umhvørvismerkið “Blóman”.
Seinastu 10-20 árini eru umhvørvisvinarligar vørur og tænastur vorðnar alt vanligari. Stóri vøksturin í úrvalinum av umhvørvisvinarligum vørum í handlunum, er ein ábending um, at kundaskarin, sum hugsar um umhvørvið, tá keypt verður, er vaksandi.
Enn eru fá virki og handlar í Føroyum, sum framleiða ella bjóða eina vøru ella tænastu, sum er umhvørvismerkt. Ymsar orsøkir kunnu vera til, at so er. Møguliga er ov lítil vitan um, hvat skal til, fyri at ein vøra ella tænasta kann fáa eitt umhvørvismerki.
Í Føroyum er einans tvey svanagóðkend virki: Føroya Prent í Tórshavn og Estra í Gøtu.
Kunningarfundir um Svanamerkið
Fyri at økja um vitanina um norðurlendska umhvørvismerkið “Svanurin” og evropeiska umhvørvismerkið “Blóman”, fara vit í næstu viku at skipa fyri tveimum kunningarfundum. Tveir serfrøðingar frá íslendsku Svanamerkjaskrivstovuni fara at greiða frá um umhvørvismerking og hvørjar royndi íslendingar hava gjørt sær á hesum øki. Fyri bert tíggju árum síðani vóru sera fáar íslendskar fyritøkur umhvørvismerktar. Nú er talið munandi hægri og hava íslendingar góðar royndir við Svananum.
Talan verður um tveir kunningarfundir:
Týsdagin 17. mars 2015, kl. 9-11
Evni: Umhvørvi og innkeyp – hvussu kunnu umhvørvismerki lætta um tíni innkeyp?
Málbólkur: Øll – keyparar (almennir og kommunalir innkeyparar) og seljarar (handlar o.o.)
Mikudagin 18. mars 2015, kl. 9-11
Evni: Krøv, kostnaður og samskifti við Svanamerkjaskrivstovuna. Hvat skal til hjá einum virki, fyri at fáa Svanamerkið?
Málbólkur: Fundurin vendir sær serliga til tey, sum eiga handlar, café’ir, hotell/gistingarhús, reingerðarfyritøku og onnur sløg av virkjum og vinnugreinum, sum kunnu fáa Svanagóðkenning.
Kunningarfundirnir verða á Umhvørvisstovuni, Traðargøta 38, Argir.
Hvør kann svanagóðkennast?
Her er eitt yvirlit yvir øll sløg av fyritøkum/virkjum og vørum/tænastum, sum kunnu fáa norðurlendska umhvørvismerkið “Svanan” ella ES-umhvørvismerkið “Blómuna”.
Mest viðkomandi fyri Føroyar eru helst hesi virkir og tænastur: hotell/gistingarhús – konferensuhøli – matstovur – kantinur – cafe’ir – dagligvøruhandlar – vaskari/reinsarí – bilvask – reingerðarfyritøkur – prentsmiðjur – smáhús/íbúðarbygningar. Og framleiðsla av: vindeygum/úthurðum, av reingerðarevnum og av máling.
Grøn marknaðarføring
At havi fingið eitt alment umhvørvismerki sum Svanan ella Blómuna, er góð marknaðarføring, serliga tá tað ræður um at fáa kundar, sum hugsa um umhvørvið, og sum ynskja at fremja grønt innkeyp. Ikki minst, um tú útflytir á ES marknaðin, tí har er krav um, at 20% av øllum almennum innkeypi skal vera grønt, tvs., at vøran ella tænastan skal lúka serlig umhvørviskrøv.
Svanurin fremstur
Norðurlendska umhvørvismerkið Svanurin er millum heimsins fremstu. Meðan flest onnur líknandi umhvørvismerki eru privat, er Svanurin eitt alment norðurlendskt umhvørvismerki, sum umframt at vera vælkent, eisini er útnevnt til at vera millum heimsins bestu umhvørvismerki.
Les meira:
Les meira um umhvørivsmerki -Svanan – her.
Leinkja til íslendsku svanamerkjaskrivstovuna
Leinkja til donsku svanamerkjaskrivstovuna

Vil tú vita nærri ber til at venda sær til Mariu Gunnleivsdóttir Hansen á tlf. 342400 ella senda ein t-post á us@us.fo
