Dálkaður kræklingur

Hin 6. desembur í 2006 kom hol á ein oljutanga á SEV-verkinum í Vági. Beinanvegin fór fitt  av tungolju út á Vágsfjørð, og varð fjørðurin sjónliga dálkaður. Tíðina eftir seyraði nakað av olju afturat út á fjørðin. Fyri at meta um árinini, sum oljudálkingin hevði á Vágsfjørð, varð á vári 2007 farið undir eina árinskanning, har innihaldið av sokallaðum poly-cykliskum aromatiskum hydrokarbonum (PAH) varð kannað í kræklingi í trimum umførum: tríggjar, seks og sekstan mánaðir eftir óhappið.

Úrslitini vísa, at oljudálkingin elvdi til eitt økt innihald av PAH í kræklingi.

Dálkaður kræklingur
Tá PAH-ir eru í sjónum, verða tey upphópað í kræklingi. Tá PAH nøgdirnar í sjónum minka aftur, hendir ein útskiljing av PAH frá kræklingi. Innihaldið av PAH í kræklingi gevur tí eina góða mynd av, hvussu nógv PAH hevur verið í sjónum undanfarnu tíðina.Kræklingur tikin tríggjar mánaðir eftir óhappið, varð týðiliga dálkaður við PAH. Hóast innihaldið av PAH minkaði við tíðini, var kræklingur enn nakað dálkaður við PAH sekstan mánaðir eftir óhappið.

Sjógvur og botntilfar
Árinskanningarnar fevndu eisini um kanningar av PAH í sjógvi og í botntilfari. Hóast PAH varð staðfest í sjógvi og í botntilfari, so ber ikki út frá hesari kanningini at vísa á beinleiðis samband til tungolju-dálkingina.

Frágreiðing
Tú kanst lesa meira um kanningarnar av oljudálkingini í Vági í frágreiðingini Oljudálking á Vágsfirði. Árinskanning 2007-2008, sum Umhvørvisstovan hevur givið út. Trýst herPartar av úrslitunum í frágreiðingini eru eisini við í eini størri frágreiðing um oljudálkingar í Føroyum, sum Umhvørvisstovan og Heilsufrøðilig starvsstovan í felag hava gjørt,  og sum verður almannakunngjørd í næstum. Í henni verður komið nærri inn á oljudálking sum heild og greitt verður frá kanningum, gjørdar í sambandi við aðrar størri oljudálkingar í Føroyum seinnu árini.

Fígging av kanningunum
Við heimild í umhvørvisverndarlógini varð álagt SEV at gjalda fyri árinskanningarnar á Vágsfirði. SEV hevur goldið fyri fyrsta kanningarumfar, meðan Heilsufrøðiliga starvsstovan og Umhvørvisstovan hava goldið fyri ávikavist annað og triðja kanningarumfar.

Vilt tú hava meira at vita um nýggju frágreiðingina, kanst tú venda tær til deildina Vernd á Umhvørvisstovuni, telefon  342400, spyr eftir Mariu Gunnleivsdóttir Hansen.