Skopuningar fáa nú adressur
Áarbakkin, Bøherðan, Gamlivegur, Garðavegur, Gerðisvegur, Høvdarhagavegur, Leirvíksvegur, Liðarvegur, Ognarvegur, Selatraðvegur, Skeravegur, Skopunarvegur, Skúlavegur, Tormansvegur og Tunguvegur
Landsadressuskráin, sum Umhvørvisstovan umsitur, hevur nú góðkent veganøvn og húsanummur í Skopun.
Teir 15 vegirnir í Skopun eita: Áarbakkin, Bøherðan, Gamlivegur, Garðavegur, Gerðisvegur, Høvdarhagavegur, Leirvíksvegur, Liðarvegur, Ognarvegur, Selatraðvegur, Skeravegur, Skopunarvegur, Skúlavegur, Tormansvegur og Tunguvegur.
Bygdarráðið í Skopun hevur sjálvt staðið fyri navnagávuni, sum tey í ráðnum hava arbeitt við í okkurt um hálvtannað ár.
Gerhard Lognberg, løgtingsmaður og borgarstjóri í Skopun hevur verið við at skipa fyri teirri nýggju navnagávuni.
Tey hava yvirhøvur brúkt tey nøvnini, ið hava verið, fortelur Gerhard. Til dømis er Tormansvegur uppkallaður eftir Tórmansgjógv í Sandoynni. Norður í Ognum, har ein spildurnýggj útstykking er, hevur sjálvandi latið Ognarvegi navnið. Eitt rópa tey uppi í Tungu, og vegurin eitur Tunguvegur.
Skopuningar vilja varðveita gomul býlingsnøvn og húsanøvn, sum nú eru knýtt upp í tey nýggju veganøvnini.
– Í hesi løtu skriva vit bræv til hvønn tann einasta borgara í Skopun og siga teimum, hvar hann býr.
Hetta er fínt, tí tað er, sum virkar bygdin eitt sindur størri, sigur borgarstjórin.
Nú búgva eini 510 fólk í Skopun. Áðrenn 90’ara kreppan hekk sum ein skadda yvir alt landið, búðu 620 fólk í Skopun, men við kreppuni fór fólkatalið skramblandi niður móti 400.
– Nú fjølgast aftur, sigur Gerhard Lognberg borgarstjóri væl nøgdur.
Adressukort av Skopun kann síggjast her á heimasíðuni sum pdf ella á www.kagi.fo.
